SAYA SUKA BLOG INI

INFO TERKINI

Tuesday, April 26, 2011

BELAJAR BAHASA IBAN (JAKO SEMPAMA)

SEMPAMA JAKO IBAN


1) anang mantah tingkah, laban iya endang tebiang. Anang muji sarang burung kanji, taja iya tuchi kapas magang. Anang ketawa ke sarang burung puna, taja iya ensara semina rangkang.

2)nguji ngunjur ke utai ti nekul, ka mutar ke utai ti mar.

3)”kunchit di tisi langit di asu,rusa di kaki tangga enda di emparu” reti iya : rindu tauka kelalu deka kiruh ngereja pengawa ke enda menuku tauka nadai ngenatai ke penguntung ba menoa ti jauh ,tang pengawa ti menyana tauka utai ti endang udah ditemu nguntung ke diri empu ba endor ti semak ,enggai kiruh ngereja ia.

4) baru ngelangkah sesingkang udah bekalau panjung neratang ka diri menang” = orang ke sumbung madah ke diri lebih ari orang bukai taja pan utai diulih iya mimit aja lebih ari orang bukai.

5) ”manjung di pala wong” = bedau belaban tauka betanding dulu madah ke diri udah menang.

6) ”baka tapang diwan rembia, baka lubok diwan baya” = madah ke siko-siko orang indu udah bisi orang empu tauka bini orang.

7) ”baka remaung di rumah, baka raung di tanah” = orang ti regas tauka kering di rumah tang ngereja pengawa di tanah nadai endar pengering tauka utai ulih.

8) ”banyak tai badak, mayuh tai nyumboh” = bala tubuh aja mayuh leboh ngereja utai tang utai ulih enda ngipak ke pemayuh tubuh.

9) ”bisi niki pinang, bisi niki nibong”=besiping atur/adat ,tauka enda adil/betul magi /mutuska pengawa.(kitai endang sama nemu,batang nibong tu endang utai ti mar tauka pedis di tiki laban ia endang beduri,tang meh batang pinang tu lamus@enda beduri lalu ia pan nyamai agi di tiki.

10)tuai pala upa”=disema ke kitai ngaggai siku-suku tuai@pemimpin ke kelalu lembut tauka nadai penamu serta enda patut mangku pengawa tuai.kira ke tuai ambi ke syarat aja meh nya.

11) ”baka pipit ti deka nelan buah embawang”= disema ke ngaggai orang ti ngembuan juluk ati ti besai ,tajapan iya endang nemu utai nya endang enda ulih di kerja .

12)”baka kenyulong mabok keroh, baka empalekong mabok amboh” : ngetu, tebalengga enda lama.

13) gerah mata undang … baka orang indu ti jinak bendar enggau besulu … tang enti kitai nyau keran deka ka iya, iya lalu beguai nyurut ka diri.

14) angkat engkerawai- dikena madah ke orang ti angkat sareta bebala mayuh.

15) belakang bungkuk diasuh ngema pintu, lengan singkung diasuh ngenyan alu.
Reti: orang ti nadai penemu nya diasuh ngereja pengawa.

16) kijang nyungkah punggu rebah, kijang manjung punggu pumpung.
Reti: apin kitai ngaga penyalah, apin ga orang bulih penusah, lalu enti laban kitai orang enda kena penusah.
Nadai runggang baka pededang mata keti, nadai lilih baka benih padi wi.
Reti: atur ti enda bechiping tauka enda ngari ari sepiak-sepiak.

17) di rajang baka lundu, din baka ditu.
Reti: enti endang ngelusu di menua diri, di menua orang pan baka nya meh, merinsa ngidup ke diri.


18) buah ubi laun dikali, buruk di pun
Buah empasa laun diempa lunggar taun

Reti = penemu tauka pengelandik ke dikembuan siku-siku mensia enti enda dipekunsika enggau orang bukai nadai mih guna. Penemu / pengelandik nya deka lenyau enti orang nya tadi nadai agi.


19) baka enseluai nangkap ludah
Reti : bedau abis orang bejako udah di reboh/ dilampat.

20) baka baya ditegah indu.
Reti : pinta ngenyit

21) baka kepayang ngada ka dilah
Reti : orang semina ngeluar ka jako aja tang iya empu enda ngereja pengawa.????

22) semalau nampong lachau, tawak nampong begau.
Reti : berita ka bedau pasti/ terang tang udah ditampong bala maioh.

23) nubai sungai enggau lia, nebang tapang enggau lungga, nimba perahu enggau tapa, nanjak wong enggau penimba.
Reti : ngereja pengawa enda enggau patut.

24) ka lelengga ikan enda ngaban, kudi ari enda hujan.
Reti : baka lelaki ke bisi ati ka siko indu dara tang indu nya nadai kiroh tauka iboh ka lelaki nya.

25) cit bekutu, mayau betebu
Reti : sama reti enggau “rara brunei” – ngator orang tang bisi berat sepiak. (aum juak)

26) enda burong terbai enti rangkang enda patah,enda raong nyemberai enti ai enda bah…..

27) baka idung antara mata
Reti: enda bechiping ati....

28) baka ular matak silui – orang ke lubah bendar ngereja pengawa.

29) baka ular ke udah nyilui – ular enti baru udah nyilui sigi agi pedis serta nadai pengering. Iya lembut lalu suah bendar ulih diempa jelu bukai dalam babas laban enda ulih ngerari ka diri. Kitai mensia enti disema ka orang baka ular baru udah nyilui reti nya pedis isi, baru gerai sakit serta nadai pengering.

30) baka kumang ke nupi ular sawa – ular sawa ditupi kumang ari mit tang nyau besai deka makai iya. Reti nya orang ke enda nemu beterima kasih ngagi orang ke udah nulong serta ngidup ka iya,

31) nyamai pantuk beluai ari ditelan sawa – enti kita bisi ngereja penyalah manah agi kitai ngaku salah serta minta ampun ari kitai ditinggang hukum tauka adat.

32) telan sawa enda terpanggai, tangkap kamba nadai endor mulai – orang ke bisi berasai malu nerima tolong ari orang leboh iya bisi penusah laban iya ingat ka diri empu jarang serta enda kala meri tolong ngagai orang bukai.

33) rari ke ribut tetemu ke ujan, rari ke sungkup tetemu ke pendam – nya utai ti di kenggai, nya ga utai ti datai(nyadi)

34) baka perau nganta ke pengkalan – sempama urang ke baru belaki bebini, maia ti baru datai di rumah entua, cukup pemanah, cukup rajin ngereja pengawa. Tang nadai lama aja

35) menyadi perut jani, kaban perut ikan – urang ke deka bekaban lebuh maia kitai senang ajak. Enti udah maia di tuntung penusah, nadai ia ibuh agi.

36) duruk bubut seduai ruai :ngereja pengawa beduruk enggau pangan diri enda enggau ati ti lurus/enggai ngereja ia manah( iya ke enda lurus nya,burung bubut,burung ruai lurus enggau bubut)bisi dlm bup ensera iban.

37) bulan begantung senduk: suntuk@ rapas belanja

38) baka ke meda balak entua: tegenung/tegepang/tebelenga/enda tepansut ke jaku/deka ngelara serba salah(utai baka tu suah nyadi laban org. Kelia ke agi besirat) taja pia kitai enda kanji baka sekeda bansa l**t



Jaku sempama form 1

1   bisi ati           1.   Bisi pengerindu ngagai siku-siku orang.
                          2.     Bisi utai dikedeka/dikeinginka.
2   nyima ati            ensiban ati/enda nyamai ati.
3   buah mulut   pekara ti nyadika batang kenang/randau orang.
4   ngambi ati   1.   Nyima.
                       2.   Ngereja pengawa ti ngasuh orang rindu.
5   baka rutan dibelah dua.   Sama seri. Sama pengelandik, pemandai, penau, pemajik/penyigat etb.
6   baka abu di puchuk tuga.   Tugil pendiau. Enda tetap.
7   baka kepayang ngadaka dilah   bejaku aja tang enda enggau ngereja.
8   baka pitak dibuai mata.   Nadai daya/penunga agi.
9   baka ukui labuh anak.   Engselalat kia-kia.
10   baka ke nganti sungai enda beulu.   Nganti ngapa. Bedau temu penatai/asal.
11   agi bekulit agi bedaki.   Agi idup agi ulih gawa lalu bulih barang.
12   pandak mulut engkerasak panjai mulut kitai.   Mulut kitai mensia amat dipeda pandak ari mulut engkerasak, tang alai disebut panjai laban mulut kitai mensia jampat nusui rita ngagai pangan diri.
13   antu berumah di baruh dagu.   Penusah tau nyadi ba siku-siku sebarang maya, nya alai anang puni jaku.
14   dilah enda betulang.   Nyebut nyamai, ngereja pedis.
15   gatal ati   balat ingin deka ngereja.
16   keru ati   mudah ringat tauka deka nganu.
17   jai ati   enda manah ati enggau orang.
18   liat ati   1.   Enda mudah ringat.
                   2.   Teguh pengarap.
19   niat ati   pekara ke dikeinginka.
20   alah penepan  
21   tinggi penepan   orang bedama besai pangkat.
22   labang apai, labang ga anak.   Petangai anak murihka perangai apai indai.
23   tibar jala enda betating.   Jaku empegal nadai beruru.
24   bejalai betungkatka adat, tinduk bepanggalka pengingat.   Adat basa mesti dikemeranka dini-dini alai kitai diau. (anang sekali-kali ngereja pengawa enggau ngaga ulah ti ngelanggar adat)
25   biar mati anak, anang mati adat.   Adat besai guna tauka reti dalam pengidup.
26   genggam bara apai sampai nyadi arang.   Pegai kereja enggau ati mutus, lalu anang ngelengka ke ngapa ensepi pedis.
27   kala udah basah nyamai terus nyelam.   Alang-alang udah tekelanjur ngereja sesebengkah pengawa, pajakka pengawa nya sampaika tembu tauka bisi asil.

No comments:

Post a Comment

LinkWithin

Related Posts with Thumbnails